ئیمانۆئێل مەکرۆن سەرۆک کۆماری فەڕەنسا ئەمڕۆ چوارشەممە 14ی خەزەڵوەر لە پەیوەندی تەلەفونی لەگەڵ مەسعوود پزشکیان، هاوتای ئێرانیی، بۆ هەڵگرتنی هەنگاوی کردەکی لە پێناو چارەسەرکردنی هەندێک لە ئاستەنگەکان و پابەندبوون بە ڕێککەوتنەکان بە نیسبەتی دیدارەکانی ڕابردوو، سپاسی خۆی ئاراستەی سەرۆک کۆماری ئێران کرد.
مەکرۆن وتیشی: پێویستە بۆ چوارچێوەیەکی دانوستانیی نوێ هەوڵ بدەین بۆ ئەوەی بتوانین بگەینە ئەنجامێکی ڕوون لە نێوان ئێران و وڵاتانی ڕۆژئاوایی و وێڕای هەڵوەشاندنەوەی گەمارۆکان، پەیوەندی بەرامبەرمان باشتر و تۆکمەتر و بەربڵاوتر بکەین.
هاوکات مەسعوود پزشکیان لە وەڵامی لێدوانەکانی هاوتای فەڕەنسیی بە ئاماژە بە پێشینەی گفتوگۆ و دانوستانی کۆماری ئیسلامی ئێران لەگەڵ ئەمریکا، ڕایگەیاند: هەمیشە وتوومانە کە بەپێی فتوای ڕێبەری ئێران و چوارچێوەی دوکتەریەنی ئەمنی و بەرگریمان بەدوای چەکی ئەتۆمییەوە نین، بەڵام دەبینین کە دیسان بە بیانووی درۆیین گوشار و گەمارۆی زیاتر دەخرێتە سەر ئێران.
ڕاشیگەیاند: ئێران بەردەوام پێشوازی لە گفتوگۆ و دانوستان دەکات، بەڵام ئێستا لایەنی بەرامبەرە کە دەبێ هەنگاوێکی متمانەگەرانە هەڵبگرێت و ڕێز لە مافی کۆماری ئیسلامی ئێران بگرێت و بەدوای سەپاندنی زێدەڕۆییەکانی نەبێت. چونکە نەک ئێران، بەڵکوو دەبێ ئەمریکا و ئەورووپا بەدوای متمانەسازی و ڕاستگۆیی لەگەڵ ئێران بن.
Your Comment