هێزى داعش لە حەمرینەوە هاتوچۆى پارێزگاکان دەکات

لیوا مەردان: هێزى داعش لە ڕێگەى زنجیرە چیاى حەمرینەوە هاتوچۆى پارێزگاکان دەکات


به پێی هەواڵ دەریی ئەهلو بەیت(ع) ، ابنا: فەرماندەى میحوەرى قەرەتەپەى سەربە پارێزگاى دیالەى هێزى پێشمەرگە، ئاماژە بەوەدەکات هێزەکانى داعش لە رێگەى زنجیرە چیاى حەمرینەوە لە نێوان پارێزگاکانى موسڵ ، کەرکوک ، سەڵاحەدین و دیالەدا هاتوچۆ دەکەن و هێز بەو ناوچانەدا دەسورێننەوە.

لیوا مەردان چاوشین فەرماندەى میحوەرى قەرەتەپەى پێشمەرگە، پـێیوایە زنجیرە چیاى حەمرین و ناوچەکانى نێوان پارێزگا سونەنیشینەکان هێندە فراوانە بە هیچ هێزێکى سەربازى کۆنترۆڵ ناکرێت ، دەڵێت"داعش سودى لە فراوانى و بۆشایى ئەمنى ناوچەکە وەرگرتووە و مەفرەزەى چەکدار لە نێوان پارێزگاکاندا ئاڵوگۆڕ پێدەکات."

قسەکانى ئەو فەرماندەیەى پێشمەرگە، لەکاتێکدایە پێشتر راپۆرتێکى نهێنى ئاراستەى لیژنەى ئاسایش و بەرگرى پەرلەمانى عێراق کرابوو لەسەر زۆربوونى ژمارەى چەکدارەکانى داعش لەقەزاى حەویجە رۆژئاواى کەرکوک، هەروەها دوو هەفتە لەمەوبەریش داعش تاوەرەکانى کارەباى نێوان ناحیەکانى جەلەولا و قەرەتەپەى لەپارێزگاى دیالە تەقاندبویەوە.

لیوا مەردان چاوشین، روونیشیکردەوە لە ئێستادا داعش خۆى رێکدەخاتەوە و مەفرەزەى چەکدار رەوانەى ناوچە دوورە دەست و بێ‌ کێشەکان دەکات ، وتى"ئەو چەکدارانەى داعش کە هاتونەتە سنورى حەمرین سەرجەمیان شارەزاى جوگرافیاى ناوچەکەن."

دروستبونەوەى جم و جۆڵى داعش لە کاتێکدایە، سونەکانیش لە هەوڵدان بۆ پێکهێنانى هێزى چەکدار و چەند رۆژێک لەمەوبەریش هەوڵى ناردنى فەوجێکى 100 چەکدارى درا بۆ سنورى قەرەتەپە، بەڵام کورد رەتیکردەوە.

لەو بارەیەوە لیوا مەردان وتى"دروستکردنى حەشدى نیشتیمانى سونەکان و رازیبوون یان رازى نەبونى پێشمەرگە لەسەر رێکەوتنى سیاسى نێوان هەولێر و بەغدا دەوەستێتەوە."

دەستپێکردنەوەى جم و جۆڵى داعش لەپارێزگا سونەنیشینەکان ، لە کاتێکدایە شەڕ لەناو موسڵ بەردەوامە و بەرپرسانى عێراقیش باس لە وەدەرنانى داعش لە عێراق دەکەن.