بە ڕاپۆرتی ئاژانسی هەواڵی ابنا - ئەمڕۆ سێشەممە لە سەلاحەددین مەسعود بارزانی، پێشوازی لە باڵوێز جێمس جێفری، نێردەی تایبەتیی ئەمریكا بۆ كاروباری سووریا و شاندێكی یاوەری كرد.
لە دیدارەكەدا بارودۆخی سیاسیی و دواپێشهاتەكانی عێراق و هەنگاوەكان بۆ پێكهێنانی حكوومەتی تازەی عێراق و ئەگەرەكانی بەهێزبوونەوەی تیرۆریستانی داعش لە عێراق تاوتوێ كران.
لە بەشێكی تری ئەو كۆبوونەوەیەدا ڕۆشنایی خرایە سەر بارودۆخی سووریا و دوایین هاوكێشە مەیدانییەكانی ئەو وڵاتە و، بیروڕا لەبارەی ڕۆڵی لایەنە كوردییەكان لە پێشهاتەكانی سووریا ئاڵوگۆڕ كرا .
لای خۆیەوە بارزانی جەختی لەوە كردەوە كە پێویستە لە هەر بارودۆخێكدا ڕێگە لەوە بگیرێت کە گەلی كورد لە سووریا تووشی گرفت و چارەنووسی نادیار ببێتەوە و نابێ بە هیچ شێوەیەك گۆڕانی دیموگرافی لە باكووری ڕۆژهەڵاتی سووریا ڕوو بدات.
پەیوەندییەكانی نێوان هەرێمی كوردستان و ئەمریكا تەوەرێكی‌تری ئەو بابەتە بوو و هەماهەنگی و كاری هاوبەشی هەردوولا بۆ شەڕی دژی تیرۆر بەرز نرخێندرا و جەختیش لە فراوانتركردنی هەماهەنگیی دوولایەنە كرایەوە لە بوارە جیاجیاكاندا.
...........
340
