سەرۆک وەزیرانی پێشوو و جێگری سەرۆک کۆماری ئێستای عێراق ڕایگەیاند، لەدوای تەنگتربوونی دەسەڵاتی داعش لە ناوچەکە ئەو ڕێکخراوە و قاعیدە لە گفتوگۆدان بۆ دروستکردنی هاوپەیمانییەک.
بەپێی هەواڵێکی سایتی ئەلعەرەبییە ئەیاد عەلاوی سەرۆک وەزیرانی پێشوو و جێگری سەرۆک کۆماری ئێستای عێراق وتوشیەتی، "زانیارییەکان سەبارەت بە دروستکردنی بەرەیەکی هاوبەش لەنێوان قاعیدە و داعشدا لەلایەن سەرچاوە ناوچەییەکانەوە پشتڕاستکراوەتەوە".
بەپێی سەرچاوەکە ئەیاد عەلاوی ڕاشیگەیاندووە "دوو نوێنەری داعش و قاعیدە بەناوی ئەبووبەکر بەغدادی و ئەیمەن زەواهیری گفتوگۆیان کردووە کە چۆن دەتوانن بەرەیەکی هاوبەش دروستبکەن".
ئەوە لەکاتێکدایە کە جۆن دوریان وتەبێژی هاوپەیمانی نێودەوڵەتی دژی داعش ڕایگەیاندووە کە ''کەمتر لە هەزار چەکداری داعش لە موسڵ ماون و چارەنووسی ئەوانەش یان خۆبەدەستەوەدانە یان مردن''.
داعش لەساڵی ٢٠١٤دا بەشێکی زۆری خاکی سوریا و عێراقی کۆنترۆڵکرد و لەئێستادا دوای سێ ساڵ لە شەڕی ئەو ڕێکخراوە سنوری دەسەڵاتەکانی بەرتەسکتر دەبنەوە.
