ئێران: وڵامی توند بە میکانیزمی پەلەپیتکە دەدەینەوە

 عێراقچی لە کۆبوونەوەی کۆمیسیۆنی ئاسایشی نیشتمانی و سیاسەتی دەرەوەی مەجلیسی شۆرای ئیسلامی، ڕاپۆرتێکی سەبارەت بە دانوستانی ناڕاستەوخۆی کۆماری ئیسلامیی ئێران و ئەمریکا پێشکەش بە ئەندامانی کۆمیسیۆن کرد و ڕوونکردنەوەکانی سەبارەت بە خولی پێنجەمی دانوستانەکان لە ڕۆما خستەڕوو.

ناوبراو جەختی لەوە کردەوە کە کۆماری ئیسلامی ئێران لەژێر گوشاردا دانوستان ناکات و دیپلۆماسیەتی ئێمە بە شێوەیەکی زیرەکانە و تەنیا لەسەر پرسی ئەتۆمی بەردەوامە و سیاسەتی کۆماری ئیسلامی ئێران ڕوون و ئاشکرایە و ناچێتە ژێر گوشار و هەڕەشە.

وتەبێژی کۆمیسیۆنی ئاسایشی نەتەوەیی و سیاسەتی دەرەوەی مەجلیسی شۆرای ئیسلامی ڕایگەیاند: وەزیری دەرەوەی ئێران هەروەها ئاماژەی بە دژایەتی ڕژیمی زایۆنیستی بۆ پیتاندنی یۆرانیۆم لە ناوخۆی ئێران کرد و وتی: لە ئەگەری ڕوودانی شەڕ لە ناوچەکەدا، هەموو وڵاتان زیانیان پێدەگات و تەواوی ناوچەکەش زەرەرمەند دەبێت.

عێراقچی ئاماژەی بەو پێشنیارانە کرد کە لە دانوستانەکاندا هاتوونەتە ئاراوە و ڕایگەیاند کە ئێمە پێشوازی لە دامەزراندنی ناوەندێکی پیتاندنی ناوچەیی دەکەین، بەڵام پیتاندن لە ناوخۆی وڵاتدا دەبێت بەردەوام بێت.

عێراقچی ڕایگەیاند: ئێران هەرگیز مێزی دانوستانی به جێنەهێشتووه و دیپلۆماسی بەردەوامه .

وەزیری دەرەوەی ئێران هەروەها سەبارەت بە میکانیزمی پەلەپیتکە وتی: ئەگەر ئەم میکانیزمە چالاک بکرێت، وەڵامەکەمان توند دەبێت.