بەپێی ئاژانسی رۆیتەرز، وەزارەتی گەنجینەی ئەمریکا سزای بەسەر سێ بەرپرسی باڵای ئاسایش و سەرۆکی کۆمپانیای نەوتی حکومی ڤەنزوێلادا سەپاندوە، ئامانج لەم هەنگاوەش دروستکردنی فشاری زیاترە لەسەر حکومەتەکەی مادورۆ.
وەزارەتی دەرەوەی ئەمەریکا ئاشکراشیکرد، لەگەڵ پێنتاگۆن لە وتوێژدان بۆ ڕەوانەکردنی بڕی 200 تۆن یارمەتی و پێداویستی مرۆیی بۆ سنورەکانی کۆڵۆمبیا تا لەو ڕێگەیەوە بگەیەنرێتە دەست هاوڵاتیانی ڤەنزوێلا.
200 تۆن یارمەتی و پێداویستی مرۆیی رەوانەی ڤەنزوێلا دەکەین
لە بەرامبەردا کویڤیدیۆ بەرپرسی دەزگای هەواڵگری ڤەنزوێلا کە یەکێکە لە سزادراوەکان رایگەیاند، ئەمریکا بەرپرسانی ئاسایشی ڤەنزوێلا لەبەرئەوە سزادەدات کە رێگری لە کودەتای سەربازی ئەمریکا و ئۆپۆزسیۆن دەگرن.
لای خۆشییەوە وتەبێژی وەزارەتی دەرەوەی ئەمریکا رایگەیاندوە، یارمەتی و هاوکارییە مرۆییەکانی ئەمریکا بەهاوکاری و ئاگاداری خوان گوایدۆ، سەرۆکی کاتی ڤەنزوێلایە و تەواوی هاوکارییەکان لە رێگای فڕۆکەوە دەگەیەنرێتە سنورەکانی کۆڵۆمبیا.
یارمەتی و هاوکارییە مرۆییەکانی ئەمریکا بەهاوکاری و ئاگاداری سەرۆکی کاتی ڤەنزوێلا رەوانە دەکرێن
ئەمریکا دەیەوێت لەلایەک فشارەکانی بۆسەر سەرۆکی ئێستای ڤەنزویلا زیادبکات و لەلایەکی دیکەش کاریگەری سزاکان لەسەر هاوڵاتی ئەو وڵاتە کەمبکاتەوە، ئامانج لەم کارەش رێگە خۆشکردنە بۆ زیاتر ناساندنی سەرۆکی ئۆپۆزسیۆنی ئەو وڵاتە و لادانی دەسەڵاتی نیکۆلاس مادورۆ کە زیاتر لە روسیاوە نزیکە.
