محەمەد ئیسلامی سەرۆکی ڕێکخراوی وەزەی ئەتۆمی ئێران لە لێدوانێکدا بۆ کەناڵی سکای نیوو‌ز ڕایگەیاند کە دامەزراوە ئەتۆمییەکانی ئێران لە شەڕی دەستدرێژانەی ئەمریکادا خاپوور بوون، سەرەڕای گوشارە نێودەوڵەتییەکان و هەڕەشەی هێرشی دووبارەی ئیسرائیل، نۆژەن دەکرێنەوە.
ناوبراو زیاندیتنی دامەزراوە ئەتۆمییەکان لە میانەی هێرشی سەربازیی بە شتێکی ئاسایی زانی و وتیشی: گرینگ ئەوەیە کە زانست، تەکنۆلۆژیا و پیشەسازی، ڕیشەیەکی دێرین و قووڵی لە مێژووی ئێراندا هەیە و ئێران مافی خۆیەتی بەرگری لە گەشەی توانستی ناڤۆکیی بکات و ئێمە گەلێ جار وتوومانە کە ئەو کارە بە مەبەستی ئاشتی‌خوازانە دەکەین.
ئیسلامی سەبارەت بە هۆکارەکانی پێداویستیی ئێران بە پیتاندنی ئۆرانیۆم تا ئاستی نزیک بە پلەی چەکەمەنیی، وتی: ئاستی پیتاندن کە لە ڕای گشتی و میدیاکاندا بڵاو بۆتەوە، لە لایەن سیاسەتوانان، درۆزنان و دوژمنانی ئێمەوە پەرەی پێدراوە و ئاستی باڵای پیتاندن، هەمیشە بۆ چەکەمەنی نییە و ئێمە بۆ ئامراز و کەرەسەی ئەندازەگرتنی وردبینانە و هەستیار پێویستمان بە پیتاندن لە ئاستی باڵادایە.
Your Comment