حەزرەتی ئایەتوڵا خامەنەیی ڕێبەری مەزنی شۆڕشی ئیسلامی ئەمڕۆ دووشەممە لەدیداری هەزاران کەس لە چین وتوێژە جیاجیاکانی خەڵکی پارێزگا جۆربەجۆرەکانی ئێراندا، فەرمووی: بەرجام دەریخست کە ڕێگای پێشکەوتن و باشتربوونی ڕەوشی ژیان و گوزەرانی خەڵک، گرینگیدان بە پرسە ناوخۆییەکانە نەک ئەو دوژمنانەی بەردەوام لەناوچەو جیهاندا خەریکی تەگەرەنانەوە لەبەردەم ئێراندان.
حەزرەتی ئایەتوڵا خامەنەیی بەپێداگریی لەسەرپەند وەرگرتنی گەلی ئێران لە ڕەفتار و هەڵس وکەوتەکانی ئەمریکا لەمەڕ پرسی بەرنامەی هەنگاوی هاوبەش(بەرجام)، فەرمووی: ئەوان دەڵێن وەرن لەمەڕ پرسەکانی ناوچەش پێکەوە دانوستان بکەین، بەڵام ئەزموونی بەرجام وامان پێ دەڵێ ، ئەو کارە، کارێکی ژەهراوی سامناک و جێی مەترسییەو لەبارەی هێچ پرس و بابەتێکەوە ناکرێ بە قسەو لێدوانی بەرپرسانی ئەمریکی متمانە بکەین.
بەڕێزیان، فەرمووی ؛ دەستتێوەردان و دوژمنایەتی ئەمریکا تەنیا بە کۆماری ئیسلامی ئێران بەرتەسک نابێتەوەو لەمەڕ پرسەکانی ئەم دواییەی تورکیاوە، هەندێ تۆمەت وبوختانی بەهێز لەئارادایە کە گوایە ، کودەتا بەڕاوتەگبیر و هەماهەنگی و ئامادەیی ئەمریکییەکان ئەنجامی گرتووە کە گەر بێتوو ئەوە بسەلمێندرێ، ریسوایی و شەرمەزارییەکی مەزن بۆ ئەمریکییەکان دەبێ.
ڕێبەری مەزنی شۆڕشی ئیسلامی هەروەها بەئاماژە بە ڕەوشی ناوچەکە، فەرمووی: ئاشکرابوونی پەیوەندییەکانی حکومەتی ئالی سەعوود لەگەڵ رژیمی زایۆنیستی ، خەنجەرێکە لەسەر پشتی ئۆممەتی ئیسلامی و خەیانەتێکی مەزنە بەڵام لەو هەڵە مەزنەشدا ئەمریکییەکان دەور دەگێڕن، چونکە حکومەتی سەعوودییەکان، شوێنکەوتەی ئەمریکایە.
بەڕێزیان، دەسدرێژکاریی بۆسەر یەمەن، بۆردومانی بێ بڕانەوەی"ماڵ و خانووبەرەکان، نەخۆشخانەو خوێندنگەکان" و منداڵکوژیی بەردەوامی وەک تاوانکاریی گەورەی دیکەی عەرەبستان ناوبردو فەرمووی: بەداخەوە تەنانەت کاتێک ڕێکخراوی نەتەوەکان پاش دەمێک بەنیازە ئەو تاوانکارییانە شەرمەزار بکات، بەپارە، هەڕەشەو گوڕەشەو زەخت و گوشار، دەمی دەبەستن.
ڕێبەری مەزنی شۆڕشی ئیسلامی بەئاماژە بەدەورگێڕانی ئەمریکییەکان لە پێکهێنان و بەهێزکردنی گرووپە تەکفیرییەکان بەئامانجی دووبەرەکی نانەوە لەنێو ئۆممەتی ئیسلامیدا، فەرمووی: ئەوان بە پێچەوانەی ئیدیعاو بانگەشەکانیان لەمەڕ بەرەنگاربوونەوەی گرووپە تەکفیرییەکان، هیچ هەنگاوێکی کاریگەر وبەکەڵک لەدژ ئەو گرووپانە ئەنجام نادەن و بەپێی هەندێ ڕاپۆر، تەنانەت یارمەتیشیان دەدەن.
بەڕێزیان، ڕێگاچارەی کێشەو پرسەکانی ناوچەی گەڕاندەوە بۆ "یەکڕیزیی نەتەوەکان و حکومەتەکانی موسڵمان" و خۆڕاگریی لەهەمبەر ئامانجە ئیستکبارییەکانی ئەمریکا و هەندێ دەوڵەتی ئوروپایی و فەرمووی: سەرباری هەموو هەوڵ و کۆششی ئەمریکییەکان، بەرنامەو پلانەکانیان لەقاو دراوەو ئەمریکا لەناوچەدا تادێ زیاتر لاواز دەبێ....
کۆتایی کورتە نامە310
