دوابەدوای ئەوەی بەرەبەیانی ئەمڕۆ هێزە عیراقییەکان دەستپێکردنی پرۆسەی کۆنترۆڵکردنەوەی قەزای راوە-یان لە رۆژئاوای ئەنبار راگەیاند، لەنیوەڕۆی ئەمڕۆدا ئەو قەزایە بەتەواوی کۆنترۆڵکرایەوە.
لەلاپەڕەی تایبەتی خۆی لەفەیسبووک، حەیدەر عەبادی پیرۆزبایی لە هێزە عیراقییەکان و گەلی عیراق کردووە بەبۆنەی ئازادکردنەوەی قەزای راوە.
عەبادی نووسیوویەتی "هێزە پاڵەوانەکانمان لەماوەیەکی پێوانەییدا قەزای راوە-یان کۆنترۆڵکردەوەو بەردەوامن لەپاککردنەوەی جەزیرە و بیابانەکان و دابینکردنی ئاسایشی سنوریی عێراق."
هەروەها ئاماژەی بەوە کردووە کە کۆنترۆڵکردنەوەی قەزاکە لەماوەی چەند کاتژمێرێکدا "رەنگدانەوەی هێز و توانای گەورەی هێزە چەکدارە پاڵەوانەکانمان و پلانە سەرکەوتووەکانمانە لە شەڕەکاندا."
بەرەبەیانی ئەمڕۆ هێزە عیراقییەکان پرۆسەی کۆنترۆڵکردنەوەی قەزای "راوە"ـیان دەستپێکرد.
قەزای راوە دەکەوێتە سنوری پارێزگای ئەنبار و لەسەر رووباری فوراتە، لەدوای کۆنترۆڵکردنەوەی "قائیم"، ئەو قەزایە بووەتە دواین پێگەی رێکخراوی داعش لە عیراق.
