ئەندامێكی شاندە سەربازییەکەی هەرێمی كوردستان بۆ دانوستاندن لەگەڵ بەغدا رایگەیاند، وەرەقەیەكی7 خاڵییان بۆ گفتوگۆكردن ئاراستەی حكومەتی عێراقی كردووە. گوتیشی "لەسەر ئەو 7 خاڵە چاوەڕێی وەڵامی حكومەتی عێراقین".
جەبار یاوەر، ئەمینداری گشتی وەزارەتی پێشمەرگەی هەرێمی كوردستان بە تۆڕی میدیایی رووداوی راگەیاند: "لە دوایین كۆبوونەوەی شاندی سەربازی هەرێمی كوردستان و حكومەتی عێراق، كە رۆژی پێنجشەممە 2-11-2017 لە موسڵ ئەنجام درا، هەردوولا وەرەقەیەكی 7 خاڵیان بۆ گفتوگۆكردن ئامادە كردبوو، دوای وردبینیكردن لەسەر وەرقەكەی هەردوولامان و رەزامەندی سەركردایەتی سیاسی كوردستان، ئێمە وەرقەیەكی 7 خاڵیمان بۆ عێراق ناردووەتەوە و چاوەڕێی وەڵامی ئەوانین".
ئەمینداری گشتی وەزارەتی پێشمەرگەی هەرێمی كوردستان، ئامادەنەبوو ناوەڕۆكی 7 خاڵەكە ئاشكرا بكات، بەڵام گوتی "بەشێوەیەكی گشتی، تەوەری خاڵەكان لەسەر بوونی هێزی هاوبەشە لەناوچە جێناكۆكەكان، ئەو هێزە چەند بێ؟ چۆن و كێ سەرپەرشتییان بكات؟ داواشمان كردووە لە خاڵە سنوورییەكان هێزی مەدەنی لێبێت لەگەڵ هێزی هاوپەیمانان، تاوەكو ئێستا لەو7 خاڵە لەسەر 3 خاڵیان ناكۆکیمان هەیە".
لە 16-10-2017 حەشدی شەعبی و سوپای عێراق هێرشیان كردە سەر باشووری كوردستان و كەركووك و خورماتوو و هەندێ ناوچەی دیكەیان كۆنترۆڵكرد، دوای ئەوەش هێرشەكانیان لە پارێزگای هەولێر و دهۆک و دەشتی نەینەوا بەردەوامبوو، بەڵام لەلایەن هێزی پێشمەرگەوە بەرپەرچ درانەوە. لە دوای ئەوە حكومەتی عێراقی جوڵە سەربازییەكانی راگرت و بەسەرپەرشتی ئەمریكییەكان گفتوگۆ لەنێوان هەردوولا دەستیپێکرد و چەندین كۆبوونەوەی هاوبەشیش كراوە، بەڵام تاوەكو ئێستا نەگەیشتوونەتە رێككەوتنی كۆتایی.
