بە پێی ڕاپۆرتی کەناڵی ئاسمانیی سەحەر بە گێڕانەوە لە میدیاکانی ھەرێمی کوردستان، بەگوێرەی راگەیەندراوێکی نوسینگەی راگەیاندنی جێگری سەرۆک وەزیران، «قوباد تاڵەبانی» جێگری سەرۆک وەزیرانی هەرێمی کوردستان ئەمڕۆ یەکشەممە ڕایگەیاند: ئێمە وەک یەکێتی لەگەڵ ئەوەداین هەڵبژاردن بەم زووانە بکرێت و هەموو هەوڵێکیشمان بۆ ئەوەیە هەڵبژاردنێکی پاک و بێگەرد و ئازاد و دادپەروەرانە بەپێی ستانداردە نێودەوڵەتییەکان بەڕێوەبچێت بۆئەوەی متمانەی هاوڵاتییان بە هەڵبژاردن و دامەزراوەکان بەهێزتر ببێت.
جێگری سەرۆک وەزیرانی ھەرێم ئاماژەی بەوەشدا، لە ماوەی رابردودا کۆبونەوەکان لەگەڵ لایەنەکان ئەرێنی بوون و تەنها هەندێک خاڵی ناکۆکی لەسەر پرسی کورسیی کۆتاکان ماوە کە ئەوانیش قابیلی چارەسەرکردنن و گەشبینین لەماوەیەکی نزیکدا رێککەوتنی کۆتایی بکرێت.
سەبارەت بە کێشە ناوخۆییەکانی هەرێمی کوردستانیش، قوباد تاڵەبانی رایگەیاند: ئەم کێشانە زیانیان بە پێگەی هەرێم گەیاندووە، هەربۆیە ئێمە وەک یەکێتی پێشتریش رامانگەیاندوە، ئامادەین بۆ هەرجۆرە دەستپێشخەرییەک.
وتیشی: لە ئێستادا هەندێک هەوڵ هەیە و گەشبینین لە داهاتویەکی نزیکدا بە ئاڕاستەی چارەسەریی هەنگاو بنێین و بتوانین بەسەر بەشێکی زۆری کێشەکاندا زاڵ ببین.
تاڵەبانی باسی پەیوەندییەکانی نێوان هەرێم و بەغداشی کردو وتی: ئێمە دەمانەوێت کێشەکانمان لەگەڵ بەغدا بەشێوەیەکی ریشەیی و بۆ ماوەی درێژخایەن چارەسەر بکەین، ئەگەر بتوانین کێشەکانی ناوخۆمان له هەرێم چارەسەر بکەین، بە یەکگرتویی و یەکڕیزییەوە باشترو ئاسانتر دەتوانین کێشەکانمان لەگەڵ بەغدا بە جۆرێک چارەسەر بکەین کە لە بەرژەوەندیی هەردولادابێت.
342/