«سەیید ئیبراهیم ڕەئیسی» ئەمڕۆ دوای گەشتە دوو ڕۆژەکەی بۆ سوریا، بەدەم گەڕانەوەی بۆ تاران، لە وتووێژێکدا لەگەڵ ڕۆژنامەنوسان، ئەنجام و دەستکەوتەکانی گەشتە دوو ڕۆژە فەرمییەکەی بۆ سوریا بەچڕوپڕی شی کردەوەو وتی: دوای ١٢ ساڵ خۆڕاگریی گەل و حکومەتی سوریا دژی پیلان و ئاژاوەی دوژمنان و پشتیوانیی کۆماری ئیسلامیی ئێران بۆ ئەم خۆڕاگری و وەستانە، ئەم گەشتە بۆ هەردووک وڵات و ناوچەکە گرنگایەتییەکی زۆری هەبوو.
سەرۆک کۆماری ئێرانی ئیسلامی ڕاشیگەیاند: هاوکاری لە بواری بەرهەمهێنان و دابەشکردنی وزە، ئاسانکاری لە ڕووی هاوکاریی ئابووری و بازرگانی بە دامەزراندنی بانک و بیمەی هاوبەش ، بەهێزکردن و فراوانکردنی ترانزێتی نێوان ئێران، عێراق و سوریا لەو تەوەرانەی ئەو ١٥ بەڵگەنامەی هاوکارییە بوون کە لە نێوان هەردوو وڵات واژۆ کران.
ڕەئیسی تیشکی خستەسەر دیداری لەگەڵ گرووپە جۆربەجۆرەکانی خۆڕاگریش و وتی: ئەمڕۆ خەڵکی سوریا و ناوچەکە لەو باوەڕەدان کە کۆماری ئیسلامی ئێران کۆڵەکەیەکی پتەوو دارێکی قورس و قایمە کە دەتوانن پشتی پێ ببەستن و متمانەی پێ بکەن.
342/