لە سووریا جێگری یەکەمی بەغدادی کوژرا

سوپای ئەمریکا رایگەیاند، لە ئۆپەراسیۆنێکی زەمینیدا لە سووریا، یەکێک لە جێگرانی ئەبوبەکر بەغدادی، خەلیفەی داعش کوژراوە.

لەگەڵ ئەوەی سوپای ئەمریکا هەواڵەکەی راگەیاندووە، بەڵام ئاماژەی بە ناسنامەی ئەو کەسە نەکردووە و شوێنی کوژرانەکەشی دیارینەکردووە.

بەپێی هەواڵ دەری ئەهلی بیت .ع.ابنا: ئەوە لەکاتێک دایە چەند رۆژێک پێش ئێستا هەواڵی دەستگیرکردنی ئەبوبەکر بەغدادی لەلایەن دەزگا هەواڵگرییەکانی رووسیا و سووریا لە سووریا بڵاوکرایەوە، بەڵام تاوەکو ئێستا هەواڵەکە بەفەرمی ڕانەگەیێندراوە.
میدیاکانی رووسیا رایانگەیاند، ئەو زانیاریانە دەست نووسینگەی زانیاری و ئاسایشی ئەوروپا کەوتوون و ئەوان زانیارییەکانیان بڵاوکردوونەتەوە.

لەوبارەوە هەیسەم ئەبوسەعید، بەرپرسی راگەیاندنی نووسینگەی زانیاری و ئاسایشی ئەوروپا، راگەیاند "پشتڕاستی دەکەمەوە کە بەغدادی لەلایەن دەزگا هەواڵگرییەکانی رووسیا و سووریا لە سووریا دەستگیرکراوە".

بەڵام نووسینگەی راگەیاندنی وەزارەتی دەرەوەی رووسیا، راگەیاند "ئێمە هیچ ئاگایەکمان لە دەستگیرکردنی ئەبوبەکر بەغدادی خەلیفەی دەوڵەتی ئیسلامیی نییە و هیچ ئاگاداری و روونکردنەوەیەکمان لەوبارەیەوە بۆ نەهاتووە".

ئەبوبەکر بەغدادی کێیە؟

ئیبراهیم عەواد ئیبراهیم بەدری ناسراو بە (ئەبوبەکر بەغدادی) ، ساڵی 1971 لە قەزای سامەڕای سەر بە پارێزگای سەلاحەدین لەدایكبووە . ساڵی 2010 بووەتە ئەمیری دەوڵەتی ئیسلامی لە عێراق، لە تەمموزی 2014دا خەلافەتی ئیسلامی راگەیاند و خۆیشی لە رۆژی 5ی تەمموزی 2014دا لە (مزگەوتی نوری گەورە ) وتاری نوێژی هەینی پێشكەش كرد وەكو خەلیفەی دەوڵەتی ئیسلامی .

ئەبوبەکر بەغدادی ، بڕوانامەی بەكالۆریۆس و دكتۆرای لە زانكۆی ئیسلامی لە بەغدا بەدەستهێناوە . بەلانیكەم دوو هاوژینی هەیە . لە كۆتایی ساڵی 2004 لەلایەن ئەمریكییەكانەوە دەستگیركرا و تاوەكو ئازادكردنی لەساڵی 2006 لە سەربازگەی بوكا زیندانی بوو لە بەسرا . چەند رێكخراوێكی بچووكی دامەزراندووەو، دوای كوژرانی زەرقاوی لەلایەن ئەمریكییەكانەوە ، بووەتە كەسێكی دیار لەنێو لقی قاعیدەدا لە عێراق . دوای كوژرانی ئەبو حەمزەی موهاجیر ، بووەتە كەسی یەكەمی قاعیدە لە عێراق .

ئەبوبەکر بەغدادی ، تائێستا تەنیا یەكجار بەشێوەی ڤیدیۆیی دەركەوتووە و، چوار كاسێتی دەنگیشی بڵاوكردووەتەوە . خۆی لە دەركەوتن پاراستووە . ئەو كەسێك بووە لەنێو رێكخراوەكەشیدا زۆر جار بە دەمامكداری قسەی بۆ بەرپرسانی رێكخراوەكەی كردووە ، بۆیە ماوەیەك بە ناوی " شێخی دەمامكدار" نێوبانگی دەركردبوو . هەموو ئەوانەی پێش تێكەڵاوبوونی ئەبوبەکر بەغدادی لەگەڵ رێكخراوە چەكدارە توندڕەوەكاندا ئەویان دەناسی، دەڵێن كەسێكی زۆر قسەزان و لەسەرەخۆ و ئارام بوو .