گرووپی نێودەوڵەتی: بۆ یەکەم جار لە بیست ساڵی ڕابردوودا، پارتی داد و گەشە پێگەی یەکەمی لەدەست دا و لە بواری هەڵبژاردنەکاندا بووە دووهەمین پارتی تورکیا.
هەڵبژاردنەکانی دوێنێی تورکیا بە بەشداری سەدا 77 ی خەڵک، نزمترین ئاستی بەشداری خەڵکی لە 20 ساڵی ڕابردوو بوو. وادیارە هەڵاسان، هەژاری و ناڕەزایەتی لە کردەوەی حکومەت، هۆکاری ئەو نزم بوونە بووە.
دۆخی سیاسی تورکیا ئێستا لە بەرژەوەندی ئەردۆغان و کابینەکەی نییە چونکوو شارەوانیی ئەنقەرە و ئەستەنبۆڵ و هەروەها چەند شاری ستراتیژیکی دیکە لە دەستی دژبەرانی ئەردۆغاندایە.
پارتی داد و گەشە ڕوو لە لاواز بوونەوە
پارتی کۆماری گەلان توانی لە هەڵبژاردنەکانی شارەوانییەکان 37.74 لەسەدی دەنگی خەڵک بەدەست بهێنێت و ببێتە یەکەم و پارتی داد و گەشەش بە وەدەستهێنانی 35.49 لەسەدی دەنگەکان بووە دووهەم.
داد و گەشە دوێنێ توانی کلیلی 505 شارەوانی بەدەست بهێنێت لە حاڵێکدا کە خولی پێشووی 818 ی بەدەست هێنابوو. ئەو ڕەقەمە لە خولی پێشوودا بۆ پارتی گەلان 23 کە لە دوێنێدا گەییشتە 420 کلیل.
شرۆڤەکارانی تورکیا پێیان وایە کە کشانەوەی کەمال قلیچدار ئۆغڵوو ڕێبەری پارتی کۆماری گەلان و سپاردنی ئەو بەرپرسیارێتییە بە سیاسەتوانی گەنج بە ناوی ئوزگور ئوزەل، ڕۆڵی گرینگی لە سەرکەوتنی ئەو پارتە کۆنە هەبوو چونکوو ئوزەل، پێوەندی باشی لەگەڵ چینە جیاجیاکانی خەڵک و لەوانە گەنجان هەبوو و گەنجانیش سەرەنجی تایبەتیان دایە ئەو و ئەکرەم ئیمام ئۆغڵوو.
ئەردۆغان لە بەرانبەر دوو کێشەی گەورە
ئەردۆغان و پارتەکەی لەلایەک لەگەڵ قەیرانی گەورەی ئابووری بەرەوڕوویە و دووهەمیشئەنجامی هەڵبژاردنی شارەوانیەکان و دابەزینی پێگەی ئەو پارتە بۆ ئاستی دووهەم لە تورکیا، ڕەوایی و ئیعتباری پارتەکەی تووشی کێشە کردووە.
لە هەمان حاڵدا، لە ڕەوتی هەڵبژاردنەکانیش، 17 وەزیری کابینەی ئەردۆغان لە ئەستەنبۆل و ئەنقەرە، بە ئەنجامی دەیان سەردانی گشتی داوایان لە خەڵک کردبوو کە دەنگ نەدەنە دژبەران. بەڵام هیچ یەکە لە ئەو هەوڵانە ئەنجامی نەبوو و ئاک پارتی قورسترین شکسیتی مێژووی 23 ساڵەی خۆی خوارد. ئێستا ئەبێ چاوەڕوان بین کە ئەو شکستی قورسە تا چ ڕادەیەک لە سەر گۆڕانکارییە سیاسییەکانی تورکیا کاریگەری دادەنێت.