«عەبدولفەتاح ئەلبورھان» فەرماندەی سوپا و سەرۆکی ئەنجومەنی دەستەڵاتی گواستنەوەی سودان، ڕۆژی شەممە لە چاوپێکەوتنێکدا لەگەڵ کەناڵی جەزیرە ڕایگەیاند: لە ھێزەکانی کاردانەوەی خێرکرا کە چوونەتە نێو خارتومی پێتەختی ئەم وڵاتە داوای کردووە بگەڕێنەوە بۆ بارەگاکانیان و ئەگەر ململانێکان بەردەوام بوو، هێزەکانی سوپا لە هەموو ناوچەکانەوە بانگ دەکات بۆ خارتوم.
دوابەدوای ململانێی نێوان سوپای سودان و هێزەکانی کاردانەوەی خێرا، فەرماندەی پاسەوانی سەرۆکایەتیی سودان ڕایگەیاند کە سوپا بەتەواوی کۆنترۆڵی فەرماندەیی گشتیی بەدەستەوەیەو "عەبدولفەتاح ئەلبورهان"، فەرماندەی سوپا و سەرۆکی ئەنجومەنی حوکمی سودان، لە شوێنێکی سەلامەتدایە و بە شێوەیەکی شەخسی چاودێری ئۆپەراسیۆنە سەربازییەکان دەکات.
بەڵام میلیشیاکانی کاردانەوەی خێرا بە بڵاوکردنەوەی بەیاننامەیەک ڕایانگەیاند کە لە ئێستادا دەستیان بەسەر کۆشکی سەرۆکایەتی و «بەیت زیافە»و فڕۆکەخانەکانی خارتوم و مەروی و ئەلئەبیەزدا گرتووە.
ناکۆکییەکانی نێوان سوپای سودان و هێزی کاردانەوەی خێرا کە پێکەوە سەرکردایەتی کودەتاکەی ئۆکتۆبەری ٢٠٢١ی ئەم وڵاتەیان کرد، لە چەند مانگی ڕابردوودا پەرەی سەندووە.
342/