په‌یامی هادی عامری بۆ خه‌ڵكی كوردستان ده‌كات

پێشنیوه‌ڕۆى ئه‌مڕۆ ئارام شێخ محه‌مه‌د جێگرى سه‌رۆكى ئه‌نجومه‌نى نوێنه‌ران عێراق له‌شارى به‌غداد له‌گه‌ڵ له‌هادى عامرى سه‌رۆكى ڕێكخراوى به‌در كۆبوه‌وه‌، تیایدا عامری په‌یامێكی ئاڕاسته‌ی خه‌ڵكی كوردستان و كورده‌كانی باشور و ناوه‌ڕاستی عێراق كرد.

بە پێی هەواڵ دەری ئەهلی بەیت ع.ابنا: له‌ كۆبوونه‌وه‌كه‌یاندا، ئارام شێخ محه‌مه‌د و سه‌رۆكى ڕێكخراوى به‌در پرسى ڕیفراندۆم و دۆخى كوردانى ناوه‌ڕاست و باشورى عێراق تاتوێده‌كه‌ن و ته‌ئكید له‌ دیالۆگ و گفتوگۆ ده‌كه‌ن بۆ چاره‌سه‌ركردنى  كێشه‌كان.

ئارام شێخ محه‌مه‌د جێگری سه‌رۆكی ئه‌نجومه‌نی نوێنه‌رانی عێراق، ڕایگه‌یاند: وێڕای ناكۆكى و جیاوازییه‌كانمان خاڵى گرنگ به‌لاى ئێمه‌وه‌ به‌رده‌وامبونى دیالۆگ و گفتوگۆیه‌ كه‌ به‌شارێى چاره‌سه‌رى هه‌موو كێشه‌كانى ده‌زانین.

وتیشى: گرنگه‌ ڕێگه‌ نه‌درێت به‌به‌رزبونه‌وه‌ى ده‌نگى هه‌ڕه‌شه‌و گوڕه‌شه‌ و خۆشكردنى ئاگرى ناكۆكییه‌كان له‌هه‌ر لایه‌كه‌وه‌ بێت، هیواشى خواست چڕكردنه‌وه‌ى هه‌وڵه‌ ناوخۆیى و نێوده‌وڵه‌تیه‌كان له‌باره‌ى ڕیفراندۆم بمانگه‌یه‌نێته‌ چاره‌سه‌رێكى په‌سه‌ندكراو بۆ هه‌موان.

جێگرى سه‌رۆكى ئه‌نجومه‌نى نوێنه‌رانى عێراق داواشى له‌هادى عامرى كرد وه‌ك دۆستێكى دێرینى خه‌ڵكى كوردستان ڕۆڵ و كاریگه‌رى خۆى به‌كاربهێنێت به‌تایبه‌ت له‌به‌رگرتن له‌هه‌ر گرژى و ئاڵۆزییه‌ك و وه‌ڵامدانه‌وه‌ى ئه‌و ده‌نگانه‌ى هه‌ڕه‌شه‌ له‌كورد ده‌كه‌ن و ده‌یانه‌وێت ترس و دڵه‌ڕاوكێ دروستبكه‌ن.

هه‌ر له‌ كۆبوونه‌وه‌كه‌دا هادى عامرى ڕایگه‌یاند: ساڵانێكى زۆر له‌گه‌ڵ برا كورده‌كانمان له‌یه‌ك سه‌نگه‌ردا شه‌ڕى دیكاتۆریه‌تمان كردووه‌ و ئێستاش له‌یه‌ك نیشتماندا پێكه‌وه‌ ده‌ژین، جیاوازییمان هه‌یه‌ له‌ تێڕوانیدا و ڕاپرسى جیابونه‌وه‌ به‌قازانجى گه‌لى كورد نازانین به‌ر له‌وه‌ى به‌زیان بۆ به‌غدا لێكیبده‌ینه‌وه‌.

عامرى وتیشى: ده‌مه‌وێت له‌ڕێى به‌رێزتانه‌وه‌ ئه‌و په‌یامه‌ بۆ خه‌ڵكى كوردستان و كوردانى ناوچه‌كانى ناوه‌ڕاست و باشور بنێرم كه‌ وه‌ك چاومان پارێزگاریان لێده‌كه‌ین و به‌هیچ شێوه‌یه‌ك ڕێگناده‌ین ده‌ستدرێژیان بكرێته‌ سه‌ر، هیواشى خواست هه‌وڵه‌كان ئاكامێكى لێبكه‌وێته‌وه‌ له‌به‌رژوه‌ندى هه‌موو گه‌لانى عێراق و پاراستنى ئاسایش و سه‌قامگیرى بێت.